Azərbaycan Respublikası Mərkəzi Seçki Komissiyasının (MSK) sədri Məzahir Pənahov Böyük Britaniyanın Parlament Araşdırmaları üzrə Beynəlxalq Mərkəzinin dəvətinə əsasən, Malyaziyanın paytaxtı Kuala Lumpurda rəsmi səfərdədir. Səfərdə məqsəd Böyük Britaniyanın Parlament Araşdırmaları üzrə Beynəlxalq Mərkəzinin və Malyaziya Mərkəzi Seçki Komissiyasının təşkilatçılığı ilə keçiriləcək seçki məsələlərinə həsr olunmuş VII Beynəlxalq Simpoziumda iştirak etməkdir. 3-4 dekabr tarixində keçiriləcək tədbirin mövzusu "XXI əsrdə seçki islahatları”dır. Simpoziumun keçirilməsində məqsəd tədbirə qatılan müxtəlif ölkələrin seçki qurumları rəhbərlərinin və seçki ekspertlərinin seçki prosesi və onun idarə edilməsində əldə etdikləri təcrübələri bölüşmək və bu sahə ilə bağlı fikir mübadiləsi aparmaqdır.

Səfər çərçivəsində MSK sədrinin bir sıra digər görüşləri də nəzərdə tutulmuşdur.

Səfərdə Azərbaycan Respublikası Mərkəzi Seçki Komissiyasının sədrini Komissiya Katibliyin müdiri Rövzət Qasımov müşayiət edir.