Müstəqil Dövlətlər Birliyinin müşahidə missiyası Azәrbaycan hökumətinin dəvətilə sentyabrın 10-dan prezident seçkilərinin monitorinqinə başlamışdır. MDB monitorinq missiyası hazırda təşviqat kampaniyasını izləyir.

Müstəqil Mətbuat Mərkəzi xəbər verir ki, bunu Azərbaycanda prezident seçkilərinin monitorinqi üzrə MDB monitorinq missiyasının qərargah rəisi Yevgeni Sloboda demişdir.

Onun sözlərinə görə, seçkilərə hazırlıq təqvim planı üzrə öz qaydasında, sakit keçirilir. Prezidentliyə namizədlərin hamısı üçün televiziya və radioda pulsuz efir vaxtı nəzərdə tutulmuşdur. Teledebatlar keçirilir və hər bir namizəd seçkiqabağı proqramlarını təqdim etmək və məşvərətçi səs hüququna əsasən mərkəzi və dairə seçki komissiyalarına öz nümayәndәlәrini göndərmək hüququ əldə etmişdir.

MDB monitorinq missiyasının qərargah rəisinin sözlərinə görə, hər bir namizədə Seçki Məcəlləsinə uyğun seçki kampaniyası keçirməsi üçün hər cür şərait yaradılmışdır.

Slobodanın sözlərinə görə, MDB missiyası seçki prosesi ilə bağlı müxtəlif şikayət və müraciətlərə baxan səlahiyyətli orqanlarla sıx əlaqə saxlayır.

Prokurorluğa qanun pozuntusu ilə bağlı, biri anonim olmaqla 5 müraciət daxil olmuşdur.

"Daxili işlər naziri Ramil Usubov, baş prokurorunun birinci müavini Rüstəm Usubovla görüşümüz olmuşdur. Görüş zamanı bizə seçki kampaniyasının keçirildiyi müddətdə və seçkilər günü ictimai asayişin təmin edilməsi üçün həyata keçirilən tədbirlər barədə ətraflı məlumat vermişlər” – deyə, Y. Sloboda bildirmişdir.