Bakı, 27 sentyabr (AzərTAc). Sentyabrın 27-də Mərkəzi Seçki Komissiyasının (MSK) binasında yerləşən vebkameralara texniki nəzarət mərkəzinə baxış keçirilmişdir.

AzərTAc xəbər verir ki, tədbirdə MSK sədri Məzahir Pənahov və Rabitə və İnformasiya Texnologiyaları naziri Əli Abbasov seçki prosesində informasiya kommunikasiya texnologiyalarından (İKT) istifadənin genişləndirilməsi ilə bağlı görülmüş işlərlə tanış olmuşlar.

Rabitə və informasiya texnologiyaları nazirinin müavini İltimas Məmmədov seçkiyə hazırlıqla bağlı görülmüş işlər haqda məlumat vermişdir. Bildirilmişdir ki, ölkə ərazisində yerləşən 125 dairənin hər birinə optik xətt çəkilmişdir

İ.Məmmədov qeyd etmişdir ki, seçki məntəqələrində quraşdırılmış veb-kameraların sayı 500-dən 1000-ə çatdırılmışdır. MSK-nın binasında yerləşən vebkameralara texniki nəzarət mərkəzində daim bu görüntülərə nəzarəti təmin etmək və keyfiyyəti tənzimləmək mümkün olacaqdır. Diqqətə çatdırılmışdır ki, seçki günü "Elektron hökumət” portalı və MSK-nın müvafiq internet səhifələri vasitəsilə həmin veb-kameralara qoşulmaqla səsvermə prosesini canlı izləmək mümkün olacaqdır.

Tədbirdə MSK katibliyinin informasiya mərkəzinin müdiri Rüfət Gülməmmədov təqdimatla çıxış etmişdir. Bildirilmişdir ki, MSK-nın veb-saytı yeni dizayn və məzmunda istifadəçilərin istifadəsinə verilmişdir. Burada məlumatlar Azərbaycan və İngilis dillərində sinxron təqdim olunur.

Qeyd edilmişdir ki, MSK seçicilərə göstərdiyi xidmətlərin bir qrupu elektronlaşdırılmış və "elektron hökumət” portalına qoşulmuşdur. MSK tərəfindən altı xidmət "elektron hökumət” portalı vasitəsi ilə seçicilərin istifadəsinə verilmişdir. Seçki günü isə daha üç xidmət seçicilərə təqdim olunacaqdır.

R.Gülməmmədov diqqətə çatdırmışdır ki, seçicilər "elektron hökumət” portalına inteqrasiya olunmuş xidmət vasitəsilə adını, soyadını, atasının adını, cinsini və təvəllüdünü yazmaqla səs verəcəyi məntəqəni və həmin məntəqənin aid olduğu dairəni müəyyənləşdirə bilərlər. Seçicilərin həmin dairənin və məntəqənin yerini xəritə üzərində görmək imkanı da vardır. Həmçinin, seçicilər olduqları yeri xəritə üzərində qeyd edərək məntəqəyə gedən yolu müəyyənləşdirə biləcəklər.

Rüfət Gülməmmədov qeyd etmişdir ki, MSK-ya seçici siyahısı ilə bağlı 4915 online müraciət daxil olmuşdur. Müraciətlərdən 4560-ı təmin edilmiş, 355 müraciət isə anonim olduğundan onların müraciətinin təminatı mümkün olmamışdır.

MSK-sədri Məzahir Pənahov qeyd etmişdir ki, Azərbaycanda informasiya-kommunikasiya texnologiyaları (İKT) sahəsində əldə olunmuş nailiyyətlərdən seçki prosesinin şəffaf keçirilməsində geniş istifadə olunur. M. Pənahov qeyd etmişdir ki, artıq MSK-da müasir İKT sisteminin tətbiqi genişləndirilmişdir. Bütün seçki dairələri və məntəqələr müasir rabitə sistemləri ilə tam təmin olunmuşdur.

Rabitə və informasiya texnologiyaları naziri Əli Abbasov isə vurğulamışdır ki, səsvermə günü seçki məntəqələrində prosesə nəzarət etmək üçün quraşdırılmış veb-kameralara nəzarət sistemi müasir texnologiyalarla təmin edilmişdir və tam hazır vəziyyətdədir, bütün məntəqələr dayanıqlı rabitə ilə təchiz edilmişdir.