Məzahir Pənahovun sədrliyi ilə noyabrın 10-da Mərkəzi Seçki Komissiyasının növbəti iclası keçirilib. Əvvəlcə Komissiyanın 2015-ci il noyabrın 5-də keçirilmiş iclasının protokolu təsdiq edilib.

Sonra 2015-ci il noyabrın 1-də Azərbaycan Respublikasının Milli Məclisinə keçirilmiş seçkilərlə bağlı Mərkəzi Seçki Komissiyasına daxil olmuş müraciətlərə baxılıb. Komissiya nəzdində fəaliyyət göstərən Ekspert qrupunun üzvü tərəfindən qanunvericilikdə nəzərdə tutulmuş müddətdə və qaydada hərtərəfli araşdırılaraq operativ şəkildə iclasa çıxarılmış müraciətlərlə bağlı müvafiq qərar qəbul edilib.

Qeyd edək ki, Komissiya üzvlərinin müzakirəsindən sonra 35 saylı Xətai üçüncü seçki dairəsinin 21 saylı seçki məntəqəsi üzrə səsvermənin nəticələrinin etibarsız sayılması qərara alınıb.

Kütləvi informasiya vasitələrinin nümayəndələrinin iştirak etdiyi iclasda cari məsələlərə də baxılıb.

Mərkəzi Seçki Komissiyası Katibliyinin
Media və ictimai əlaqələr şöbəsi