ATƏT-in Bakı ofisinin rəhbəri, səfir Xose Luis Herrero Ansola mayın 1-də Mərkəzi Seçki Komissiyasının sədri Məzahir Pənahov ilə görüşmüşdür. Səfir təmsil etdiyi qurumun Mərkəzi Seçki Komissiyası ilə indiyə qədərki əməkdaşlığının səviyyəsini yüksək qiymətləndirmiş və qeyd etmişdir ki, qarşıdan gələn prezident seçkilərində də əməkdaşlığı daha da intensivləşdirmək fikrindədirlər. O, bildirmişdir ki, 25 apreldə jurnalistlər üçün keçirilmiş seminar prezident seçkiləri öncəsi əməkdaşlıq istiqamətində ilk addım kimi dəyərləndirilə bilər. KİV nümayəndələri üçün təlimlərin davam etdirilməsinə tərəfdar olduğunu söyləyən səfir yerli hakimiyyət, məhkəmə və polis orqanları üçün də belə tədbirlər keçirmək istədiklərini diqqətə çatdırmışdır.